Purogyekiti y’amaizi etongoziibweho- Buhweju.

N’ebya Adolf Ayoreka 

Nk’omuringo gumwe gw’okuhisya abantu kb’omu disiturikiti ya Buhweju amaizi marungi, gavumenti kurabira omu minisiture y’eby’amaizi n’obuhangwa bw’ensi etongoizeho purogyekiti y’amaizi eya Bitsya Water Supply and Sanitation System.

Abantu barikuhika 50,000 kuruga omu byaro by’omu magomborora eya Karungu, Buhunga na Bitsya nibo barikuza kuganyirwa omu purogyekiti egi.

Evan Namanya, Ceeyamaani w’ekyaro ekya Ngarama A naagira ngu tibakatungaga purogyekiti yoona ey’okuhisya abantu amaizi marungi.

Namanya nakyoreka ngu ebyaro ebirimu; Kamukaki, Ngarama A na B, oteireho na Butuuro, nibitunga amaizi kuruga aha mugyera gwa Nyamwamba kandi hariho miles 4.

 “Nitusiima gavumenti ya Uganda ahabw’okututekateekaho ekarugaho ekatongozaho purogyekiti egi ey’amaizi,” Namanya arikushoborora.

Omukutongozaho purogyekiti egi, Francis Mwijukye, Omuny’ishengyero wa Buhweju, agizire ngu Buhweju niyo erikukirayo oburugo bwingi bw’amaizi nk’oku emigyera erikuheereza amaizi za disiturikiti ezigiheereire nka; Sheema, Mbarara na Ibanda beitu ebaire etakatungaga purogyekiti yoona kuruga omu gavumenti ey’okuhisya abantu amaizi marungi kandi g’amayonjo.

Ayongyeireho ngu purogyekiti y’amaizi eya Bitsya neija kuhwera munonga abatuura ba Buhweju.

Godfrey Tumwebaze, Omuhwezi wa RDC wa Buhweju ashabire konturakita okukora gye omurimo ogumuhairwe n’okureeba ngu yagyendera ahari pulaani.

Ba konturakita abarikuza kukora purogyekiti y'amaizi eya Bitsya.

Eng. Ronald Kataro, Inginiya omu minisiture y’’amaizi kandi purogyekiti manegya naagira ngu konturakita ahairwe ameezi 18 kuba yaamariire omurimo ogu kandi abantu 50,000 nibo barikuza kuganyirwamu.

#WestUpdates