Muinisita Musasizi ayongiireho ngu omu mwaka gw’eby’esente ogurikwija, tihaine mushoro musya ogurateebwe ahabintu. Photo by Parliament of Uganda.

N’ebya Omushaki weitu

KAMPALA

Minisita w’eihanga ow’eby’esente, Henry Musasizi ayanjwire omu Paramenti ekihandiiko ekirikukwata ahambariirira y’eihanga eya Shiringi 57,400,000,000,000 (Sh57.4tn) ey’omwaka gw’eby’esente ogwa 2025/2026.

Ekihandiiko eki ekyanjwirwe omu Paramenti n’eky’omwaka gw’eby’esente ogurikwija ogwa 2025/2026 kandi embariirira egi neija kuba eri ahansi y’omutwe “Full Monetization of Uganda’s economy” kurabira omukuta amaani ahaby’obuhingi n’oburiisa eby’esente, eb’amakorero, eby’akanyabwengye, okwongyera kuhangusya obuheereza, okutungira ebintu by’abantu obutare n’ebindi kubaasa kutunguura eby’entaasya y’eihanga.

Musasizi nabwo akyorekire ngu gavumenti eine enteekateeka z’okushagika embariirira y’omwaka gw’eby’esente oguriwkija kurabira omusente ez’entaasya nk’eihanga hamwe n’okuruga omu bitongore ebindi. 

Ayongiireho ngu omu mwaka gw’eby’esente ogurikwija, tihaine mushoro musya ogurateebwe ahabintu.

Omuhwezi wa Siipika wa Paramenti, Thomas Tayebwa ashabire obukiiko bwa Paramenti n’akakiiko ak’enshonga z’embaririra okushwijuma embariirira egi kandi abijukize ngu Paramenti eine kuhisya ebiro 01.02.2025 kugihamya n’okugihinguza.

Eihanga obwa hati nekorera ahambariirira y’eihanga eya Shiringi 72,000,000,000,000 (Sh72tn) ahabw’omwaka gw’esente oguturimu ogwa 2024/2025.

#WestUpdates