Omweshongozi rurangaanwa Eddy Kenzo arikucamura abeegi Ntare School ababeire bari omumushomo gwa Patriotism

N’ebya Eli Akiza

Minisita w’eby’obwegyese hamwe n’emizaano Janet Kataaha Museveni yashaba eminyeto okuba etabaaza n’eky’okureberaho omu muranga gw’okunda eihanga ryabo ninga shi ‘Patriotism’.

Ebi yaabirabya omu butumwa bwe obwamushomerwa minisita w’eihanga ow’eby’emizano Peter Ogwang aha mukoro gw’okuhendera okutendeka abeegi 1,600 ba Ntare School omu by’okukunda eihanga ryabo ninga shi ‘Patriotism’.

Omukoro ogu gwatandika na Minister Peter Ogwang arikurambura enyiriri z’abeegi aba hamwe na abeegi kuteera Bandi.

Omugwa 2019 Purezidenti Museveni akatongozaho enkora ya Patriotism n’ekigyendererwa ky’okuhwera abanya Uganda na munonga eminyeeto okwega emicwe, emitwarize hamwe n’okukunda eihanga ryabo aha mutima.

Omu butumwa bwe, Minister Janet Museveni yaagira ngu enkora egi ehwereire kihango omu ihanga Uganda.

Hellen Sseku Ori kamiishana wa ‘patriotism’ omu ofiisi ya purezidenti naagira ngu hati amaani nibaza kugata omu bashomesa, abakozi b’ebitongore bya gavumenti hamwe n’abandi beebembezi.

Bwanyima y’ebi byona abeegi aba batungaho akaire k’okushemererwa n’omweshongozi Eddy Kenzo.
Abeegi 1,600 nibo batendekirwe kandi abakozire kurungi baahaabwa ebiconco.

#WestUpdates