Mufti wa Bushenyi ayemereziibwe ahamurimo ahabw’okukoresa kubi ebintu by’obusiraamu. Photo by Bruno Mugizi.

N’ebya Bruno Mugizi

BUSHENYI 

Mufti wa Uganda, Sheikh Shaban Ramadhan Mubajje ayemeriize disiturikiti Kadhi wa Bushenyi, Sheikh Shaban Kasim Bangirana aha mirimo ye ahabw’okukoresa kubi ebintu by’obusiraamu.

Omu baruha y’ebiro 26/02/2024 eteirweho omukono Mubajje , neegira ngu baatungire amakuru garikworeka ngu Shaban Kasim akejumbira omu kukoresa kubi ebintu by’obusiraamu omu disiturikiti egi.

"Ofiisi yangye etungire amakuru kuruga omu bantu batari bamwe barikworeka  enkoresa mbi y’ebintu by’obusiraamu. Bwanyima y’okutunga amakuru aga, nahandiika ebaruha egi ndikubamanyisa ngu nayemereza Shaban Kasim aha murimo gwe nka disiturikiti kadhi w’abasiraamu omuri Bushenyi kwenda ngu abanze akyondozibweho,” Okurugiirira aha baruha ehandikirwe Mubajje.

Mubajje naagira ngu okwemereza Kasim aha murimo gwe n’omuringo ogubaire nigwetengwa kubaaasa kureetaho obumwe, amaziima n’okucondooza.

Ebyo bikiri aho, Sheikh Shaban Kasim Bangirana,orikujunaanwa agambire omunyamakuru weitu ngu takejumbiraga omukukoresa kubi ebintu by’obusiraamu nk’oku Mufti arikugamba.

"Ntwire ninkura emirimo yangye ndikukuratira ebiragiro byeitu beitu ntagiire kutunga ebaruha kuruga owa Mufti arikujunaana okukoresa kubi ebintu by’obusiraamu,” Sheikh Kasim.

Kasim naagira ngu ateerereirwe amasimu kuruga omu basiraamu barikumushaba obutaruga omu ofiisi beitu naagira ngu naija kuruga omu ofiisi aho n’aho nk’oku arangiirwe abeebembezi b’abasiraamu abakuru.

Tindikwija kwanga kuruga omu ofiisi ahabw’okuba naheeza kuremera omu ofiisi, nimbaasa kureetaho akavuyo akakubaasa kuteeganisa ediini yeitu,” Sheikh Kasim arikushoborora.

#WestUpdates