Amaka ago gatungire esente omu rukiiko orubagizireho na minisita w’ekikura ky’abantu, Peace Mutuuzo aha kitebe kikuru ky’egomborora eya Kyarumba omu disiturikiti eya Kasese. Photo by Samuel Amanyire.

N’ebya Samuel Amanyire

KASESE

Purezidenti Yoweri Museveni asaasire n’amaka agafeereirwe abantu baabo omu bitengure ebyateire disiturikiti ya Kasese omu kwezi kwa 5, 2024.

Amaka ago gatungire esente omu rukiiko orubagizireho na minisita w’ekikura ky’abantu, Peace Mutuuzo aharwamukaaga ebiro 17.08.2024 aha kitebe kikuru ky’egomborora eya Kyarumba omu disiturikiti eya Kasese.

Ebitengure ebi bikareetwa enjura y’amaani eyagwire omu disiturikiti eya Kasese na munonga omu mashaza erya Bukonzo East na Busongoro North. 

Abantu 13 nibo bafeereire omu bitengure ebi n’abandi barikurenga omuri 5,000 bagyemeserezibwa kuhunga omu maka gaabo kandi hati nibatuura omuri za kampu ahabwa kanyabwanya.

Purezidenti, owajwekiirwe Mutuuzo ahabwire abatuura abari omu myanya eri omu kabi k’okuteerwa ebitengure okuza omu myanya endiijo erigye.

Mutuuzo nabwo ahabwire abanya-Uganda okuteekateeka ahanteebekanisa y’okufuruka kuza omuri za disiturikiti ezirigye eziine amataka garikumara ahabw’okwenda kutambira amagara g’abantu n’ebintu byabo.

Ceeyamaani wa disiturikiti eya Kasese, Eliphazi Muhindi asiimire gavumenti ahabw’okugumizamu nashagika abantu na munonga omu bwire bugumire omuri okubaheereza obuhwezi bw’ebintu hamwe na shiringi miriyooni 5 ezihairwe buri ka eyafeereirwe abantu baabo.

Shiringi miriyooni 50 zihairwe amaka 10 agafeereirwe abantu baabo kandi amaka 8 n’ag’omugomborora eya Kyarumba na Kyondo kandi abiri n’ag’omu Munisiparite ya Kasese.

#WestUpdates