Babiri bafeera omuri butandu aharwa Katunguru-Ishasha omuri Rubirizi.
N’ebya Omushaki weitu
RUBIRIZI
Abantu babiri bafeera omuri butandu eyaaba aharuguuto orwa Katunguru-Ishasha omu disiturikiti eya Rubirizi omukasheeshe k’eriizooba.
Omugambirizi wa Pooriisi ahabw’ekyanga ekya Bushenyi empango, Martial Tumusiime yahamya amakuru aga arikugira ngu omuvugi wa boda-boda yamuremerera nikwo kutahira omu motoka empango eyaaba netambura erikuza Kihiihi.
Butandu egi yaaba erimu emotoka ya Mercedes Benz ehandiikire omunamba ya UAA 036J, eyaaba nevugwa Bagenda Twarihata, 58 hamwe na Piki eya Bajaj Boxer eya namba UFY 741 H.
Kubariho Sam, omuvugi wa piki hamwe n’omushabaazi Kansiime Naume, bombi abatuura b’omu maduuka ga Katunguru omu disiturikiti eya Kasese bafeeraho.
Emotoka hamwe na Piki ebyatomerana byatwarwa aha Pooriisi ya Kicwamba kandi emitumbi y’abagyenzi yatwarwa omu kabafu ah’eirwariro erya Rugazi Health Centre IV kukyeberwa.
#WestUpdates