Ronald Kusemererwa, okwateirwe obushuma bwa Piki omuri Kasese Munisiparite aharwakabiri ebiro 27.08.2024. Photo by Samuel Amanyire.

N’ebya Samuel Amanyire

KASESE

Pooriisi omu kyanga ekya Rwenzori East ekwatsire omushaija orikuteekateekwaho kuba atwire nayejumbira omu bushuma bwa Piki.

Omugambirizi wa Pooriisi ahabw’ekyanga ekyo, Nelson Tumushime aha biro 27.08.2024 obwo bari aha kitebe kikuru kya Munisiparite ya Kasese, agizire ngu nyakuteekatekwaho amanyirwe na Ronald Kusemererwa, omutuura wa Nyakasanga Lower omuri Kasese Munisiparite.

"Tumukwatiire omu garagi ye kutuhweraho omu kucondooza kweitu kandi ku tugiire kumucaaka omu maka gye, twashangamu za Piki 2 n’enamba z’ebiruka 6,” Tumushime arikwongyera kushoborora.

Okurugiirira ahari Tumushime, Pooriisi eyigwire omushango gw’obushuma ahari nyakuteekateekwaho kandi omwe aha bavugi ba boda-boda, Gilbert Muhindo ohonire okwitwa aharwamukaaga bwanyima y’okuteerwa abainazi aha mutwe bakamwibaho piki ye. 

Muhindo akiriyo naragurirwa obuhuta obu yaatungire ah’eirwariro erya Mt. St. Mary’s hospital.

Ceeyamaani w’ekigombe ky’abavugi ba boda-boda omuri Kasese, Ali Ahmed naagira ngu obushuma bwa Piki bukanyire omu kyanga eki kandi Pooriisi eriyo necondooza abo boona abarikujunaanwa omu nshonga egi.

#WestUpdates