Purezidenti Museveni, Enganzi y'eihanga ow'okubanza Rebecca Alitwala Kadaga, State House comptroller Jane Barekye n'abandi bakuru omu gavumenti barikwigura Presidential Skilling Hub omuri Busoga.

N’ebya Beth Akatukunda

BUSOGA

Purezidenti Yoweri Kaguta Museveni nashaba abeebembezi b’ekigombe ekya NRM omu kyanga ekya Busoga okugaruzaho busya puroguraamu ya gavumenti ey’okushomera busha omu mashomero ga gavumenti aga Purayimare na Siniya ei akyorekire ngu eremesiibwe abarikushaba esente omu mashomero ago.

Bamwe omubeegi abarikushoma eby'okwombeka ahari Presidential Skilling Hub omuri Busoga barikworeka Purezidenti n'abandi bakuru obukuru obubeegire omukwombeka. PPU Photos.

Arikugambaho ahamukoro gw’okwiguraho omwanya ogwa Busoga Zonal Presidential Industrial Hub omuri Nakabango omu rurembo orwa Jinja, Purezidenti ayorekire okukwatwaho ahabw’abeegi baingi abarikuruga omu eishomero kweyongyera ahabw’okurembwa okushashura esente ezi barikubashaba omu mashomero ga gavumenti, n’obu gavumenti yateireho puroguraamu y’abeegi kushomera busha omu mashomero aga.

Purezidenti Museveni, Hon Rebecca Kadaga n'abeegi abarikushomera ahari Presidential Skilling Hub omuri Busoga.

Purezidenti Museveni ashoboriire ngu ekiteekateeko kya NRM eki yabaire eine omukubanza n’okubanza n’okureeba ngu buri muruka gwagira eishomero rya Purayimare n’erya Siniya agu abeegi barikushoma nibataaha. 

Gavumenti ekaaba eri ey’okushashura emishaara y’abashomesa, okugura ebitabo n’ebindi ebirikwetengwa kandi omuzaire we akaaba ari ow’okuheereza abaana be entanda.

Beitu hoona, ekigyendererwa eki kikafa bwanyima y’amashomero aga gavumenti okutandika kushaba abazaire esente ekireteire abaana baingi baabura kushoma ahabw’okuremwa esente ezo.

Purezidenti Museveni agizire ngu gavumenti eshemeriire kugaruka aha bigyendererwa bya puroguraamu ey'abeegi kushomera busha kubaasa kumaraho ekizibu ky’abaana kuruga omu eishomero n’okureeba ngu abaana bagira nyensya nungi.

Rebecca Alitwala Kadaga, Omuhwezi w’enganzi y’eihanga ow’okubanza kandi omuny’ishengyero-kazi wa Kamuli asiimire Purezidenti ahabw’okushagika eminyeto etaine mirimo kurabira omukutaho puroguraamu z’okubangura abeegi omu by’emikono kandi ashabire Purezidenti kwongyera kutaho emyanya nk’egi omu kyanga ekya Busoga ahabw’okwenda kwongyera ahamubaro gw’abeegi abaine obukugu omu by’emikono.

#WestUpdates