Purezidenti Museveni ataayaayire Eliot Mukasa, omuhingi owaatungire esente za PDM omu kyaro ekya Buwanda omu disiturikiti eya Luuka ahabiro 22.01.2025.

N’ebya Beth Akatukunda

LUUKA

Purezidenti Yoweri Museveni ayorekire okushemererwa arikugira ngu puroguraamu ya PDM ehweriire abantu b’omu byaro kuruga aha kuhingira enda baaza omu buhingi obw’esente.

Purezidenti ori omu kyanga ekya Busoga kureeba oku puroguraamu ya PDM eriyo neteebwa omunkora nyomwebazyo, ataayaayire Eliot Mukasa, omuhingi owaatungire esente za PDM omu kyaro ekya Buwanda omu disiturikiti eya Luuka.

Omwe ahabaatungire esente za PDM omuri Luuka, Eliot Mukasa arikushoborora Purezidenti Museveni ahari purogyekiti ye ey'okuhinga obutunda. Photos by PPU.

Mukasa owaatungire Shiringi 1,000,000 za PDM omu kicweka ky’okubanza omu mwaka gwa 2022/2023 akazikoresa kuhinga obutunda, emboga na bwanyima yaija yagura embuzi na mabaati g’okushakaaza enju ye.

Omukutaayaaya oku, Purezidenti Museveni ahaire Mukasa shiringi 10,000,000. 

Purezidenti agizire ngu Mukasa nabaasa kukoresa Shiringi 5,000,000 kugura hiika y’eitaka reero ezindi 5,000,000 aziguremu embuzi ezindi. 

Museveni agizire naija kwongyera Mukasa ezindi Shiringi 6,000,000 ez’okugura piki piki y’okutambuza emisharuuro ye. 

Purezidenti agarukire yaheereza shiringi 10,000,000 abahingi abandi 10 abeerundaaniire omu maka ga Mukasa kuhurikiriza obutumwa bwa Purezidenti Museveni obw’okuruga ahakuhingira enda bakaza omu buhingi obw’esente.

Omwe ahabaatungire esente za PDM omuri Luuka, Eliot Mukasa n'omukazi we barikusiima Purezidenti Museveni ahabw'okubataayaayira n'okurambura purogyekiti zaabo.

Mukasa asiimire Purezidenti Museveni ahabw’okuhwera abantu abakiri omukuhingira enda akabaheereza Shiringi 1,000,000 kurabira omu puroguraamu ya PDM ei arikugira ngu emuhweriire kuhindura ahamagara gye.

Minisita w’enshonga z’obwa Purezidenti, Babirye Milly Babalanda ayaakiire Purezidenti Museveni omuri Luuka kandi amusiimire ahabw’okutandikaho puroguraamu egi ebaase kuhindura amagara g’abantu baingi.

#WestUpdates