Owabaireho enganzi y’eihanga rya Kenya, Raila Odinga naija kwanjurira abantu ahaky’okwesimba kwe aha ntebe y’obwa ceeyamaani bw’akakiiko k’amahanga ga Africa aka African Union Commission.

N’ebya Omushaki weitu

KENYA

Purezidenti Yoweri Museveni n’omwe aha beebembezi 5 b’amahanga g’omu kyanga ekya East Africa abarikuteekateekwa omuri Kenya eriizooba ebiro 27.08.2024 obwo owabaireho enganzi y’eihanga rya Kenya, Raila Odinga arikubanjurira ahaky’okwesimba kwe aha ntebe y’obwa ceeyamaani bw’akakiiko k’amahanga ga Africa aka African Union Commission.

Okurugiirira aha mukuru kuruga omu minisiture y’enshonga z’omunda, ba Purezidenti 8 boona ab’omu mahanga g’omukago gw’amahanga aga East African Community bahamize kwetaba aha mukoro ogu.

East African Community n’ekigombe ekirikugaita hamwe amahanga ga 8 agarimu; Burundi, DR Congo, Kenya, Rwanda, Federal Republic of Somalia, South Sudan, Uganda na Tanzania.

Abanyabutegyeki bakuru 4 ba Africa kuruga omu eihanga erya Djibouti, Kenya, Madagascar na Mauritius bahaireyo okushaba kwabo kutwara emyanya emikuru ey’ekigombe ky’amahanga ga Africa ekya African Union.

Ekigombe ky’amahanga ga Africa ekirimu amahanga 55 nikiija kutaho akaruuru omu ruteerane rwakyo oruriho omu kwezi kwa 2, 2025 kutoorana oraaze omu bigyere bya Moussa Faki Mahamat nka ceeyamaani w’akakiiko aka African Union Commission.

Omwaka ogu, omwanya gw’okutoorana oraaze omu bigyere bya Faki- ori omunyabutegyeki mukuru kuruga Chad gureekiirweho omujwekyerwa kuruga omuri East Africa. Faki atwire nayebembera akakiiko aka African Union Commission kuruga omu mwaka gwa 2017.

Ekigombe ky’amahanga ga Africa kishohoize ekihandiiko kirikworeka abantu 4 abarimu Mahamoud Ali Youssouf owa Djibouti, Raila Odinga owa Kenya, Richard Randriamandrato kuruga Madagascar na Anil Gayan owa Mauritius abarikuhayanira obwa ceeyamaani bw’akakiiko k’amahanga ga Africa aka African Union Commission.

#WestUpdates