Enganzi y'eihanga, Robbinah Nabbanj arikwanjurira abatuura Uthman Mubarak Mugisa, okwatsire ebendera ya NRM omu karuuru ka Hoima. PHOTOs: Peter Abaanabasazi.

N’ebya Peter Abaanabasazi 

HOIMA

Enganzi y’eihanga, Robinnah Nabbanja ashabire abantu b’omu disiturikiti eya Hoima okuteerera akaruuru okwatsire ebendera ya NRM, Uthman Mubarak Mugisa omu karuuru k’okugarukamu kutoorana ceeyamaani wa disiturikiti egi arikubaraganisa ngu ofiisi ye neija kwegaita ahari Mugisa omu kurwanisa obushomankuzi omu disiturikiti.

Nabbanja obwa hati ari omu disiturikiti eya Hoima kusherurira Mugisa obushagiki omu karuuru aka.

Nabbanja agizire ngu ofiisi y’enganzi y’eihanga neija kutamu amaani kureeba ngu abantu baatunga emirimo omu disiturikiti omu muringo murungi.

Enganzi y'eihanga, Nabbanja arikugambaho n'abatuura b'omu kyaro ekya Kibanjwa omuri Hoima.

Nabbanja abaire ashendekyereziibwe abakuru kuruga omu NRM abarimu omuhwezi w’omubiki wa NRM, Jacqueline Kyatuheire, orikukurira eby'okurundaanira hamwe ba memba ba NRM, Rosemary Nansubuga Sseninde na dayirekita w’eby’empurizana omu kigombe, Emmanuel Dombo.

Ogu ayebembeire guruupu egi kuza omu byaro nka; Kipapati, Kitoba Kisonde na Kibanjwa n’ebindi aho ashabire abantu ba Hoima obutaima Mugisa akaruuru barikumutura ebi ishe yaakozire.

Entebe egyo ekasigaramu busha bwanyima y’okufa kwa Kadiri Kirungi, ishe wa Mugisa owagwire omuri butandu omu kwezi kwa kashatu, 2023 aha ruguuto orwa Kampala omu disiturikiti eya Kiboga.

Abatuura bagambeire Nabbanja n’abandi beebembezi ba NRM ngu ebicweka ebingi omu disiturikiti egi tibirimu buheereza nk’amashanyarazi, amaizi marungi, amashomero ga gavumenti n’ebindi bingi.

#WestUpdates