Enganzi y'eihanga, Robbinah Nabbanja ahamukoro gw'okujaguza ekiro ky'abakuzire omuri Kyegegwa aha Sande ebiro 01/10/2023. Photo by Philip Murangira.

N’ebya Phillip Murangira

KYEGEGWA

Enganzi y'eihanga, Robinah Nabbanja yahiga abaikuru n'abagurutsi okwehara okunywa amaarwa agarikushisha amagara gaabo kureka bakore ebisaasayizi ebirikubongyera amaani.
 
Nabbanja yaagamba ebi obu yaaba ajwekiirwe Mukuru w'eihanga aha mukoro gw’okujaguza ekiro ky'abakuzire ekyajagurizibwa omu disiturikiti ya Kyegegwa aha kishaayi kya Humura.

Nabbanja yayongyera yajumirira abantu abakuzire abarikubaganisamu amataka ngu eki kyongiire ekoresa mbi y’amataka hamwe n'emihondano. Photo by Phillip Murangira.

Buri 01/10, Uganda neyegaita ahansi yoona okujaguza ekiro ky'abakuzire okwijuka ebi abagurutsi n’abakaikuru baizire nibakora omu magara gaabo.

Engazi y'eihanga yabanza kurambura ekyombeko ekirikwombekwa akakiiko k’abakazi aha disiturikiti ya Kyegegwa bwanyima yaiguraho ekyombeka kya disiturikiti nikwo kuza aha kishaayi kya Humura ahi emikoro yakorerwa.

Ekitebe kikuru kya disiturikiti eya Kyegegwa. Photo by Phillip Murangira.

Nabbanja yayongyera yajumirira abantu abakuzire abarikubaganisamu amataka ngu eki kyongiire ekoresa mbi y’amataka hamwe n'emihondano.

Asaba Paul, Omuny’ishengyero wa Kyaka North, yaashaba gavumenti okuhisya haihi obuheereza bw’ebyamagara nk’okwombeka amarwariro aga Health Centre IV buri eishaza n’agandi kuhwera abakuzire okutunga obuheereza burungi bw’ebyamagara.

John Kisoke Akiiki, Mukuru w'entebe ya kataano ahabwa Kyegegwa yaashaba gavumenti okukora enkuuto ya Kazo-Kyegegwa-Kibaale hamwe n’okukora amaizi ga National Water.

Buri kwezi, gavumenti ya Uganda neheereza abantu abaine emyaka 80 n’okweyongyerayo shiringi 25,000.

Bamwe omu bagurutsi n'bakaikuru abahika ahamukoro gw'okujaguza ekiro ky'abakuzire aha kishaayi kya Humura omuri Kyegegwa aha Sande ebiro 01/10/2023. Photo by Phillip Murangira.

Abantu abakuzire bashaba gavumenti okugyendeza emyaka y'abagurusti abarikutunga esente eza SAGE kuruga aha myaka 80 kuza aha myaka 65 ngu ahabw’okuba emyaka 80 ni nyingi munonga kandi ngu ni bakye abarikugihisya.

Amahanga ageteriine ga kahinguza okujaguza ekiro ky'abakuzire omu mwaka gwa 1990 kandi omutwe gw'omwaka ngu gwaba nigugira okukura oine amagara marungi.

#WestUpdates