Okutiina n'okucuramirirwa, abaana bagwire omu Lake Victoria baafa.

N’ebya Samuel Nkuba

KALANGALA

Okutiina n’okucuramirirwa bishwekire abatuura b’aha mwaro ogwa Namisoke aha kirwa kya Bubeke omu disiturikiti eya Kalangala bwanyima y’abaana 3 kugwa omu Nyanja ya Victoria aharwakana ebiro 28/03/2024.

Butandu egi ebaireho shaaha 8 z’eihangwe beitu abatuura nibagira ngu baizire kumanya ngu abaana aba babura bwanyima y’okushanga emyenda yaabo eri ahankungu haihi n’enyanja ya Victoria.

Abagyenzi bamanyirwe nka; Ndajanabwe Junior, 4, Magema Mustafa, 5 hamwe na Kalema Nicholus, 6.

Okurugiirira ahari ceeyamaani w’eby’okwerinda aha kyaro, Haruna Ssekajja- abaana aba babaire nibazaanira aha mwaro batakagiire omu Nyanja kuziha amaizi ahi bagweriiremu bakafa.

“Abatuura tibakitwire nka kikuru okuhisya obu bareebire emyenda na bwanyima bakairuka bakaza aha nyanja egi ahi bareebire emitumbi y’abaana 2 erikuzeerera aha mutwe gw’amaizi,” Ssekajja arikushoborora.

Abagyenzi nibateekateekwa kuziikwa eriizooba Orwakataano. Ndajanabwe naija kuziikwa Mukono, Mustafa omuri Namutumba kandi we Karema Nicolas naija kuziikwa omu maka g’abazaire be.

Okurugiirira ahari Rose Nassanga, omwe aha batuura- baheereruka kureeba abaana aba barikuzaana omupiira obu babaire batakagwire omu Nyanja.

Pooriisi kuruga aha kirwa kya Bubeke ahamize amakuru aga kandi aikiriize abanyabuzaare baabo kutwara emitumbi kugiziika.

Ogu n’omurundi gwa kashatu, abaana barikufeera omu Nyanja. Omu kwezi kw’okubanza omwaka ogu, omwana w’omwojo w’emyaka 4 akagwa ahamwaro gwa Kasekulo omu gomborora ya Mugoye obu yabaire navuga ekidangari ky’egaari.

Ondiijo mwana akaitwa goonya aha mwaro gwa Ssanyu aha kirwa kya Buyovu omugomborora eya Bufumira kandi abandi baana 2 bakahonokaho obu babaire nibataha amaizi omu Nyanja omu kwezi kw’okubanza, 2024.

#WestUpdates