Kyomugisha naagambwa kuba aitsire omwijukuru, Henrick Abaho, 9, obaire ari omwegi ah’eishomero erya Nyakashambya Primary School omuri Sheema. Photos by Bruno Mugizi.

N’ebya Bruno Mugizi

SHEEMA

Pooriisi omu disiturikiti ya Sheema ekwatsire omukazi embura kihana ow'emyaka 56 ahabw’okugambwa kuba ateire omwijukuru akamwita arikumutura okwiba shiringi 14,000.

Omugambirizi wa Pooriisi ahabw’ekyanga ekya Bushenyi empango, Martial Tumusiime naagamba nyakukwatwa nka; Medrine Kyomugisha, omutuura w’omu kyaro ekya Rwamurongora omuri Karera North, Kashozi divijoni omu Munisiparite ya Sheema. 

Kyomugisha naagambwa kuba aitsire omwijukuru, Henrick Abaho, 9, obaire ari omwegi ah’eishomero erya Nyakashambya Primary School omuri Sheema.

Omukazi omuri Sheema omanyirwe nka Medrine Kyomugisha oitsire omwijukuru ahabwa Sh14,000 akwatsirwe Pooriisi.

Nikigambwa ngu ekikorwa eki kizire kumanywa bwanyima y'omukazi ogu kutwara omwana ogu ah’eirwariro erya Kabwohe health Centre IV ahu afeereire yaheza kumuhisya.

Omwana ku aherize kufa nikwo Kyomugisha kugaruza omutumbi gwe omuka kuza kuguziika kwonka abatuura abamureebire arikuteera omwijukuru bamanyiseho Pooriisi eizire ekamukwata. 

Kyomugisha aizire kutambirwa Pooriisi emwihire aha batuura ababaire baine ekiniga kingi barikwenda kumuteera bakamwita ahabw’okuremwa kukuma ekiniga n’obu omwijukuru amushabire okusaasirwa.

Okurugiirira ahari Martial Tumusiime, Medrine Kyomugisha obwa hati akomiirwe aha Pooriisi ya Sheema obwo okucondooza kurikugyenda omu maisho.

Omutumbi gw’omwana gutwirwe omu kabafu ah’eirwariro erihango erya Mbarara kubaasa kukyeberwa.

#WestUpdates