police

N’ebya Omushaki weitu

BUSHENYI

Pooriisi omu disiturikiti eya Bushenyi ekwatsire omushaija w’emyaka 27 ahabw’okugambwa kuba atooroboize omwana w’emyaka 7 arikumuraganisa kumuheereza ensenene.

Martial Tumusiime, Omugambirizi wa Pooriisi ahabw’ekyanga ekya Bushenyi empango naagira ngu John Byaruhanga, omukozi w’emirimo yaariija-riija omu tauni ya Ishaka akwatsirwe bwanyima y’omwishiki ogu owaatooroboize kutandika kushaasha ebicweka bye by’ekihama n’okureeta amahira.

Nyin’enkuru w’omwana ogwo, omutuura wa Cell A omuri Ishaka Divijoni agambiire Pooriisi ngu ebiro 3 ebihingwire ashangire nyakuteekateekwaho (John Byaruhanga) aine omwijukuru omu kiyungu kandi ku abuurize omushaija eki abaire nakora n’omwijukuru yagira ngu tikiriho.

Beitu hoona, omwana ogu agambiire nyin’enkuru ngu Byaruhanga amutooroboize bwanyima y’okutandika kushaasha ebicweka bye by’ekihama.

Martial Tumusiime naagira ngu okucondooza omunshonga egi kuriyo nikugyenda omu maisho.

#WestUpdates