Ekikorwa ky’obwitsi eki kibaireho aharwamukaaga ebiro 30.11.2024 omu kyaro ekya Burambika omumuruka gwa Kashasha omugomborora eya Kiyanga omuri Mitooma. Photo by Bruno Mugizi.

N’ebya Bruno Mugizi

MITOOMA

Pooriisi omu disiturikiti eya Mitooma ekwatsire omushaija ahabw’okugambwa kuba aitsire omukazi we omu kurwana omu baara.

Ekikorwa ky’obwitsi eki kibaireho aharwamukaaga ebiro 30.11.2024 omu kyaro ekya Burambika omumuruka gwa Kashasha omugomborora eya Kiyanga omuri Mitooma.

Martial Tumusiime, Omugambirizi wa Pooriisi ahabw’ekyanga ekya Bushenyi empango ahamiize amakuru aga. 

Tumusiime naagamba omugyenzi nka; Kyarikunda Aidah 45, omutuura w’omu kyaro ekya Kihungye omu muruka gwa Kashasha omu gomborora eya Kiyanga.

Nayongyera agamba nyakuteekateekwaho kuba aitsire nka Mwebesa Jackson, 48, omutuura w’omu kyaro nikyo kimwe.

Nikigambwa ngu ahabiro 30.11.2024, Kyarikunda Aidah (omugyenzi) arugire omuka yaaza kushaba kandi ku agarukire shaaha 4 z’ekiro, yaaza kunywa amaarwa omu baara ya Milton omu tauni ya Burambika.

"Nyakuteekateekwaho nawe obaire ari omu tauni niyo emwe arikunywa atandiikire kurwana n’omukazi we ou ateire omugyere akagwa omutwe akaguteera ahansi ekimurugiiriremu okufa,” Martial arikushoborora.

Nayongyeraho ngu Kyarikunda afiire obu abantu babaire bariyo nibaronda entambura y’okumutwara ah’eirwariro ry’ahaihi.

Bushoboroza Annah, Orikukurira eby’okwerinda omugomborora eya Kiyanga (DISO) naagira ngu abakundaine aba babaire nibakira kurwana baheza kugaruka omuka barikuruga kunywa.

Omutumbi gwa Kyarikunda gutwirwe omu kabafu ah’eirwariro erya Mitooma Health Centre IV kukyeberwa.

#WestUpdates