Omushaija acweriirwe kukomwa emyaka 14 ahabw’okwita ow'emyaka 3.

N’ebya Petride Mudoola

NAMAYINGO

Omushaija w’emyaka 30 acweriirwe kukomwa emyaka 14 omu kihome ahabw’okwita omwana w’omukundwa we ou yabaire ataanire nawe. 

Bernard Kafua Ndubi, 30, naagambwa kuba yayitsire Betty Abigail ow’emyaka 3, muhara wa Carolyne Chemutai, 30 owabaire ari omukundwa we. 

Nikigambwa ngu Chemutai akaba ataanire na Kafua beitu bakaikirizana kubugana bakaganiira omurundi gw’ahamuheeru beitu naagira ngu akaba atarikukimanya ngu ekigyendererwa ky’omushaija ogu kikaba kiri eky’okumwitira omwana.

Kafua akaita Abigail arikwenda kusaasa nyina (Chemutai) ahabw’okumusigaho akagyenda n’omushaija ondiijo omu loogi eyabaire eri haihi. 

Abantu abaingi bakaba nibateekateeka ngu omushaija ogu (Kafua) naaza kukuratira omukazi we omu loogi beitu we ekiniga kyona akakimarira aha mwana ou yaniganigire akamwita n’omutumbi gwe akagunaga omu kamina.

Abahababi obwo beebembirwe Robert Wasajja nibagira ngu aha kiro ky’ebiro 08/11/2018, Betty Abigail- omutuura w’omu kyaro kya Shiamulala omu muruka gwa Itama omu gomborora ya Lolwe omu disiturikiti ya Namayingo akabura kuruga omu maka ga nyina.

Kooti ehuriire ngu nyakujunaanwa (Bernard Kafua) akakundana na nyina w’omwana ogu (Abigail), Carolyne Chemutai ou yayizire akagira nawe obuteikirizana ahabw’okugambwa kuba yabaire aineyo omushaija ondiijo. Omu kiro ky’ebiro 08/11/2018, nyakujunaanwa akaza kuraara omu maka ga Chemutai.

Beitu, akashanga omushaija ondiijo ayemeriire na Chemutai aheeru y’enju nikwo kutandika kurwana. Bwanyima ya Chemutai kumwanga, Kafua akagira ekiniga yatandika kuteera ababiri aba amabare barikuza omu loogi.

Abahababi nibagira ngu nyina wa Abigail akaza kugaruka eizooba eryakuratsireho nikwo kushanga omuhara atari muka. Akatwara omushango gw’okubura kw’omwana we aha Pooriisi a Itama.

Aha biro, 16/11/2028- omutumbi gwa Abigail gukashangwa omu kamina omu kyaro ekya Shiamulala. Omutumbi gw’omwana ogwabaire gwatandikire kujunda gukatwarwa kukyeberwa kandi kikashangwa ngu akaba aniganigirwe.

#WestUpdates