Omushaija omuri Mbale abuzire bwanyima y’okwita omukazi we ahabw’obushambani

N’ebya Simon Masaba na Paul Watala

MBALE

Omushaija w’emyaka 62 omu disiturikiti eya Mbale abuzire bwanyima y’okugambwa kuba aitsire omukazi we w’emyaka 52 ahabw’okumuteekateekaho kuba aine abashaija abandi.

Nyakuteekateekwaho omanyirwe nka Godfrey Maniala, nagambwa kuba aitsire omukazi we, Felistus Maniala, omukiro ky’ebiro 20.09.2024 omu woodi ya Masaba omuri Industrial City Divijoni omu rurembo orwa Mbale.

Omugambirizi wa Pooriisi ahabw’ekyanga ekya Elgon, Rogers Taitika ahabiro 25.09.2024 agizire ngu ekikorwa ky’obwinazi eki kizireho bwanyima y’abakundaine aba kugira obuteikirizana. Ababiri aba baine abaana 7.

Taitika naagira ngu obuteikirizana burugiiriremu okurwana nikwo Felistus kuhungira omu rutookye beitu omushaija we amwirukireho. 

Okurugiirira ahari Taitika, omukavuyo k’okurwana, Maniala nagambwa kuba ahutaarize omukazi we ekimurugiiriremu okufa kwe.

Pooriisi eizire yazoora ebirwaniso ahamwanya ebibaire biriho eshagama kandi ngu okucondooza kuriyo nikugyenda omu maisho.

Taitika nabwo nakyoreka ngu emishango y’emihondano y’omu maka neyeyongyera omu kyanga ekya Elgon. 

Nayongyeraho ngu emishango erikurenga 350 y’emihondano y’omu maka niyo yahandiikirwe aha Pooriisi ahagati y’okwezi kw’okubanza kuhisya okwa 6, 2024. 

Ab’obushoborozi bariyo nibakora ekirikubasika kukwata nyakuteekateekwaho.

#WestUpdates