Omwegi wa P.7 aitsirwe omuri Masindi.

N’ebya Innocent Atuganyira

MASINDI

Pooriisi omu disiturikiti eya Masindi eine omu kihome kyayo abantu 2 abarikuteekateekwaho kuba batoroboize omwishiki w’emyaka 16 na bwanyima bakamwita omutumbi gwe bakagunaga omu mugyera gwa Kafu.

Omugyenzi amanyirwe nka; Costa Bakanya, omutuura w’omu kyaro ekya Kibangya omu gomborora eya Kimengo obaire amazire P.7 ah’eishomero erya Kayeera Parents Primary School.

Banyakuteekatekwaho bamanyirwe nka; Rodgers Amanya n’ondaijo omanyirweho erya Dickson ryonka abakwatsirwe wiiki ehwaire aharwakashatu ahabw’okugambwa kuba bateire ekirayini ahamwishiki ogu (Bakanya) bakamutoroboza na bwanyima bakamwita omutumbi gwe bakagunaga omu mugyera gwa Kafu aharw’okubanza ebiro 11.11.2024.

Ababiri abakwatsirwe obwa hati bakomiirwe aha Pooriisi enkuru eya Masindi.

Ku baabuziibwe, ababiri baikiriize kuba baitsire Bakanya omutumbi gwe bakagunaga omu mugyera gwa Kafu. 

Omutumbi gwe Bakanya gwizire kureebwa abajubi b’eby’enyanja ahamwaro ogwa Kikaito ahanyanja eya Lake Kyoga omu disiturikiti eya Kiryandongo.

Abajubi b’eby’enyanja bamanyiiseho Pooriisi ehikire aha mwanya naaba famire y’omugyenzi kandi omugyenzi eizire kumanywa Nasasira Livingstone- munyanya w’omugyenzi omukuru.

Steven Kamuhanda, ishento w’omugyenzi agambiire abanyamakuru ngu Bakanya akabura agiire kuriisa ente aharw’okubanza ebiro 11.11.2024 kandi kuruga obwo bakaba batwire nibamuronda kuhisya obu bamushangire afiire.

Simon Peter Ochitti, orikukurira Pooriisi ya Masindi ey’okucondooza aha mishango asiimire abatuura ahabw’okukwatanisa kandi abashabire okuguma nibakoresa emiringo y’obusingye kugonjoora enshonga zaabo aha mwanya gw’okutwarira ebiragiro omungaro.

#WestUpdates