Samson Kasasira, Omugambirizi wa Pooriisi ahabw'ekyanga ekya Rwizi.

N’ebya Omushaki weitu

NTUNGAMO

Pooriisi omu disiturikiti eya Ntungamo eriyo necondooza nk’oku omugurutsi w’emyaka 110 aitsiremu omukazi we w’emyaka 109 y’obukuru arikumucumita oruhabyo.

Samson Kasasira, Omugambirizi wa Pooriisi ahabw’ekyanga ekya Rwizi naagamba omugyenzi nka; Bakasisa Constansio, omutuura w’omukyaro kya Kahunga 1 omu disiturikiti eya Ntungamo orikugambwa kuba aitsirwe omushaija we, Babiiha Dominic ow’omu kyaro nikyo kimwe.

Nikigambwa ngu aha biro 14/12/2023 shaaha nka 2 z’ekiro bwanyima y’okuheza kurya kyakiro, nyakuteekateekwaho ashabire omukazi we kumushanga omu kishengye kye bakabyama nikwo omukazi kwanga ngu we abaire atiine maani kandi arwire orukororo.

Kasasira naagira ngu omushaija akwatsire abaijukuru 2 baaza kubyama n’omukazi yaaza omu kishengye ekye kubyama.

Omu kasheeshe k’ebiro 15/12/2023 shaaha nka 1 y’akasheeshe, nyakuteekateekwaho ateire enduuru arikugira ngu tarikubaasa kufa wenka. Omwijukuru w’emyaka 10 ku ayigwire orwigi kureeba ekyabaho yaashanga ishenkuru akwise oruhabyo nikwo kumuragiira ngu agyende.

Kasasira nayongyeraho ngu nyakuteekateekwaho (Babiiha) ataahire omu kishengye ky’omukazi we nikwo kutandika kumucumita oruhabyo ekigyemesereize omwijukuru kushohora aheeru akateera enduuru arikwenda ngu abataka baije babahwere.

Naagira ngu bariraanwa ku bahikireho bashanga Bakasisa Constansio (omukazi wa Babiiha) yaherize kufa kandi we Babiiha Dominic ayekingiriine omu kishengye kye.

Bariraanwa ku bigwireho bashanga omushaija ari omu mbeera mbi kandi aharubaju rwe bashangireho ecupa y’omubazi gw’ebihingwa.

Kasasira naagira ngu Pooriisi erahukire kuhika aha mwanya nikwo kutwara nyakuteekateekwaho ah’eirwariro erya Itojo kuragurirwa kandi omutumbi gutwirwe kukyeberwa.

Okurugiirira aha byahikireho kuruga omu kucondooza, nyakuteekateekwaho hamwe n’omukazi batwire nibatuura hamwe omu nju emwe beitu buri omwe arikuraara omu kishengye ekye. 

Pooriisi neegira ngu omugurutsi ogu okwita omukazi we kibaasa kuba kirugiriire aha kumwima akaboozi k’ekikuru beitu okucondooza kuriyo nikugyenda omu maisho.

Pooriisi ejumiriire ekikorwa eki nikwo kushaba abantu obutoosha kuguma nibakoresa ab’obushoborozi kugonjoora enshonga zaabo.

#WestUpdates