Paasita atsindikirwe aha rumanda ahabw’okujwara ebijwaro by’ekinyamahe...(Photo by Douglas Mubiru)

N’ebya Douglas Mubiru

Kampala:

Paasita w’ekanisa eya Cross of Miracle Church Kanyanya omu rurembo orwa Kampala atwairwe omu kooti y’ekinyamahe ahabw’okujwara ebijwaro by’ekinyamahe.

Ceeyamaani wa kooti y’ekinyamahe, Brig. Gen. Robert Freeman Mugabe aharwokubanza, 01.07.2024 atsindikire Paasita Jonathan Nzogi, 31, aha rumanda omukihome ekya Kitalya kuhitsya ebiro 15/7/2024 bwanyima y’okwikiriza omushango gw’okujwara ekijwaro ky’amahe.

Omuhababi wa Gavumenti, Lt. Alex Mukhwana agambire kooti ngu ahabiro 13/6/2024 nk’ahari shaaha 10 z’omwabazyo ahanguuto eya Kampala-Mityana omu disiturikiti ya Wakiso, Nzogi akashangwa ajwaire ekijwaro ky’amahe ga UPDF n’enkofira erikutukura y’ekinyamahe.

Ogu kwabuzibwe kooti ahi yeihire ekijwaro ky’amahe, Nzogi agiizire ngu atwaire nakoresa ekijwaro eki ahabiteerane kubaasa kureeta abaikiriza omukanisa ye.

Ogu ashobooreire ngu atwaire nayiha ebijwaro ebi ahari munywani we Sergeant Ssegawa beitu ah’eizooba eri yakwatsirwe, ebijwaro ebi akaba abyihire ah’eitendekyero erya Kaweweta Military Training School omu disiturikiti eya Nakaseke.

#WestUpdates 
#RadioWestAt25