L/CPL David Omoko ou kooti eragiire ngu agaruzibwe omu mahe. Photo by Douglas Mubiru.

N’ebya Douglas Mubiru  

MAKINDYE, KAMPALA

Ekitongore ky’amahe ga UPDF kiragiirwe kugaruza omuserukare ou kyabaire kibingire omu mahe.

L/CPL David Omoko akabingwa omu mahe akakiiko akarikujunanizibwa aha micwe n’emitwarize omu UPDF aha kitebe kikuru kya Makindye omuri Kampala bwanyima y’okumusingisa omushango gw’emicwe mibi.

Bwanyima y’okumusingisa omushango ogu, Omoko akaheebwa ekifubiro ky’okukomwa emyaka 2 ekyamugyemeseriize kujuriza ekifubiro eki omu kooti y’ekinyamahe omuri Makindye, Kampala.

Kurabira omuri purida we, Elizabeth Nyasingwa, Omoko akajurizi ekifubiro ekyamuhairwe arikugira ngu kooti eyamusingiise omushango terakuratiire biragiro bwanyima y’okuremwa kusharaho obwire obu yamazire aha rumanda omu kumucwera kukomwa emyaka 2.

Arikugamba aha kujuriza oku, omutonganiirizi wa gavumenti owa ‘private’, Regina Nanzala agizire ngu ekifubiro ekyahairwe Omoko kikaba kitari kihango kandi agizire ngu n’amazima obwire obu Omoko yamazire aha rumanda tiburashazirwe aha kifubiro ky’okukomwa emyaka 2 nk’oku ekiragiro kirikugamba.

Omu kuhayo encwamu ye, ceeyamaani wa kooti y’ekinyamahe, Brig. Gen. Robert Freeman Mugabe ashangire ngu kitabaaza akateebwaho omushango ogu ebaire 29/03/2022 kandi akaheebwa ekifubiro ky’okukomwa emyaka 2 aha biro 28/07/2022.

Ayongiire yagira ngu kooti ye eshangire ngu ekifubiro ekyahairwe Omoko kikaba kiri kihango munonga.

Obuhababi nibugira ngu ahabiro 09/02/2022 ahari Kiseka IO MP Battalion omu rurembo Kampala, Omoko akoreka emicwe mibi aha mu Pooriisi mutaahi we, Haruna Opoka bwanyima y’okwanga kwigura orwigi yaheza kwetwa mukama we.

#WestUpdates