Patrick Achi, Enganzi y'eihanga erya Ivory Coast yabingwa ahamurimo ogu..

Purezidenti wa Ivory Coast yabinga Enganzi y’eihanga eri

N’ebya Omushaki Waitu

Purezidenti wa Ivory Coast, Alassane Ouattara yabinga Enganzi y’eihanga eri, Patrick Achi kandi yarangiirira okutooranaho gavumenti ensya, obwo eihanga ririkuburwayo emyaka ebiri kuteera akaruuru.

Ouattara yahandiika endagaano arikwihaho Patrick Achi emirimo ye nk’enganzi y’eihanga hamwe na gavumenti ye, kurugiirira ahakihandiiko kuruga ow’omuhandiiki mukuru wa Purezidenti, Abdourahmane Cisse.

Purezidenti yaasiima Achi na gavumenti ye ahabw’emirimo ei bakoreire eihanga kumara obwire.

Encwamu egi ebeire neteekateekwa kubaho bwanyima ya Purezidenti kumanyisa ba memba ga gavumenti ku arikwija kuhindura omu kabineeti.

Achi akatooranwa Okwakashatu 2021 bwanyima ya Hamed Bakayoko kwita ekookoro.

Eihanga erya Ivory Coast niryija kugiraho akaruuru omugwa 2025 beitu Purezidenti Outtara takarangiriire okwetsimbaho ahabw’encuro yakana.

#WestUpdates