Omukazi ashobangiriirwe n'omwana bwanyima y'okutema omusiri gwe omu disiturikiti eya Kassanda Photo by Luke Kagiri.

N’ebya Luke Kagiri

KASSANDA

Abakumi 2 ab’embundu hamwe n’abandi bantu 3 bakwatsirwe ahabw’okushiisha ebintu omunshonga z’emihondano y’eitaka omu disiturikiti eya Kassanda.

Aba bakwatsirwe omu wiikendi ahabw’okugambwa kuba bacwekyeriize ebintu omu kyaro ekya Kyakasengula omu gomborora eya Nalutuntu omu disiturikiti eya Kassanda.

“Aba bareesire ebimotoka bya ‘grader’ omu kyaro beitu itwe tihaine eki tubaire nitumanya. Kitutangarize kureeba guruupu y’abantu obwo bakumirwe abashaija b’embundu kucwekyereza emisiri yeitu,” Eriphaz Kato, ceeyamaani w’ekyaro ekya Kyakasengula arikushoborora.

Hiika z’ebihingwa, emiti hamwe n’ebindi bintu bicwekyereziibwe ekigyemeseriize abeebembezi b’ekicweka eki kweta Pooriisi eizire ekataaha omunshonga egi.

Tugyerizeho kubashaba kwemereza ebi babaire nibakora beitu amatu bagatiiremu ebiti bagumizamu nibatema ebintu. Abakazi 2 yima y’okureeba ebihingwa byabo birikucwekyerizibwa,” Kato arikwongyera kushoborora.

Eitaka eririkugambwaho n’erya Nteza orikugambwa kuba yaganiireho n’abantu bamwe abatwire ah’eitaka eri bakabagana kimwe aha kicweka ky’eitaka nikwo kubaheereza ebyapa by’eitaka. Beitu hoona, abandi bantu ababaire nibatuura ah’eitaka eri tihaine eki babagambiire.

Bwanyima y’enshonga egi,, akakiiko ka disiturikiti ak’eby’okwerinda kataayaayire ekyaro eki kumanya ekibaireho. Photo by Luke Kagiri.

Benedicto Yiga, omwe aha batuura naagira ngu baingi omu batwire ah’eitaka eri batwire nibashashura esente z’okupangisa beitu hoona omu myaka 2, landlord akanga esente zaabo.

Bwanyima y’enshonga egi,, akakiiko ka disiturikiti ak’eby’okwerinda kataayaayire ekyaro eki kumanya ekibaireho.

Omuduumizi wa Pooriisi ahabwa disiturikiti egi, Robert Tashobya aha Sande agizire ngu bakwatsire abantu abarimu abakumi aba kampuni y’eby’okwerinda ey’abantu buntu ababaire baine embundu beitu bakiriyo nibaronda mukama waabo.

Omuhwezi wa RDC ahabwa Kassanda, Faridah Bbosa naagira ngu Nteza aha kutandika kwa wiiki ehwaire abahandiikire arikubashaba kukoresa eitaka rye.

Eriizooba Orw’okubanza, tiimu y’abakuru kuruga aha disiturikiti neteekatekwa kubugana abatuura kushwijuma ebintu byabo ebi bafeeriirwe obwo okucondooza kurikugumizamu.

#WestUpdates