Omutumbi gw’omu Pooriisi Chemonges Suleiman gutwirwe omu kabafu ah’eirwariro erya Ruhoko kwongyera kukyeberwa. Curtesy Photo.

N’ebya Fred Turyakira

IBANDA

Omu Pooriisi aitiirwe aha kuziika Lazarus Kahangire, omusibe ofeereire omu kihome kya Nyabuhikye omu disiturikiti ya Ibanda.

Omugambirizi wa Pooriisi ahabw’ekyanga ekya Rwizi, Samson Kasasira nagamba omu Pooriisi oitsirwe nka; Chemonges Suleiman owa Bisheshe Police Station, obaire ahairwe omurimo gw’okuza kukuma aharufu.

Eky’obusaasi, ahikire ahamwanya mutaahi we ou abaire aine kukora nawe atakahikireho nikwo kutaahiriirwa abaziiki ababaire baine ekiniga kingi bakamuteera bakahendera bamwitsire.

Kahangire atwire aha rumanda aha mushango gw’okuteeraho kwita ogwarugiriire aha mihando y’eitaka eyabaire erimu famire ya Vincent Mbabazi nabaine nyina.

Kahangire afiire omungyeri etarikwetegyerezibwa yaheza kuhika ahari Ruhoko Health Centre IV ahi abaire atwirwe kutunga okuragurirwa.

Abaziiki abarimu abanyabuzaare ba Kahangire bajunaanire omu Pooriisi ahabw’okugira akakwate omu kufa kwe obu abaire ari omu kihome.

Kasasira ahamize ngu Pooriisi ehikire aha mwanya kandi ezoire embundu y’ekika kya SMG erimu amasasi 16.

Naagira ngu okucondooza omu nshonga egi kuriyo nikugyenda omu maisho.

Omutumbi gw’omu Pooriisi Chemonges Suleiman gutwirwe omu kabafu ah’eirwariro erya Ruhoko kwongyera kukyeberwa.

#WestUpdates