Bataano bakwateirwe obushuma omu kyanga kya Rwizi.

N’ebya Beth Akatukunda

Abantu 5 abarikuteekatekwaho kuba enkozi z’ebihagaro bakwatsirwe ab’obushoborozi abarikuta ebiragiro omunkora omu kyanga ekya Rwizi.

Aba bakwateirwe omu bikwekweto ebirikugyenda omu maisho ebigyenderiire kurwanisa ebihagaro omu bicweka bitari bimwe by’eihanga.

Omu bikwekweto ebi, Pooriisi ebaasize kuzoora emihoro, emisyo n’ebindi ebi abakwatsirwe barikugambwa kuba babaire nibakoresa kunyangaraza abashuubuzi, amaka g’abantu n’abantu abarikutambuza ebigyere obwo barikubibaho ebintu byabo.

Fred Enanga, Omugambirizi wa Pooriisi naagira ngu abakwatsirwe babaire nibakoresa piki ehandikirwe omunamba ya UEN 132S kwiba abantu kandi obwa hati nayo ekwatsirwe. 

Omubakwatsirwe harimu makanika, dureeva wa taxi hamwe n’owa boda-boda.

Enanga naagira ngu ebikwekweto ebi eby’ekika nk’eki nibyija kugumizamu kuhisya obu ebihagaro byona birahwereho kimwe omu bicweka bitari bimwe bya Ugandda.

Kuruga ebikwekweto ebi bitongozibwaho okwezi kumwe okuhingwire, abantu 120 abarikuteekateekwaho kuba enkozi z’ebihagaro nibo baakwatsirwe kandi piki 28 ezirikugambwa kuba nizikoresibwa abashuma nazo zaherize kukwatwa.

#WestUpdates