Omugambirizi wa Pooriisi, Fred Enanga naagamba omwojo oziikirwe ahuriire nka  Charles Amanya omutuura wa Kabusye omu disiturikiti ya Sheema.

N’ebya Stuart Yiga

MBARARA

Omwojo w’emyaka 16 omu disiturikiti ya Mbarara bamuteire bamuziika ahuriire ahabw’okumuteekateekaho kwiba esimu.

Omu rukiiko rw’abanyamakuru orwa buri wiiki aha kitebe kikuru kya Naguru omuri Kampala, Omugambirizi wa Pooriisi, Fred Enanga naagamba omwojo oziikirwe ahuriire nka  Charles Amanya omutuura wa Kabusye omu disiturikiti ya Sheema.

Eki nikigambwa kuba kyabaireho ebiro 28.05.2024 ahari shaaha nka 4 z’akasheeshe.

Omushaija w’emyaka 43 omanyirwe nka Apollo Kamukama,43, omutuura w’egomborora ya Bubaare hamwe n’omwojo w’emyaka 17 (ou amaziina ge gatagambwa) baherize kukwatwa kubaasa kuhweraho Pooriisi omu kucondooza kwayo.

Abakwatsirwe nibagambwa kuba bakwatsire Amanya bakamuteera barikumutura okubaibira esimu.

"Bamukwatsire bamukomera aha muti batyo batandika kumuteera. Aba bateekateekire ngu bamwita nikwo kutiimba ekiina ekibamunagiremu bakamuziika batyo bakagyenda,” Enanga arikushoborora.

Eky’omugisha omurungi, omwojo ogu abaasize ayajwire yaruga omu kiina ekyo kandi amazire ebiro 2 ari omu kasiisira ahi ashangirwe akatwarwa aha Pooriisi kandi na bwanyima atwirwe ah’eirwariro erua Bubaare kutunga okuragurirwa.

Kishangirwe ngu omwojo ogu n’enzaarwa ya Sheema kandi akaija omuri Mbarara kukora emirimo yaraijaraija.

Pooriisi neegira ngu abakwatsirwe baheerize kuteebwaho emishango etari emwe erimu ogw’okuteera, okuteeraho kwita n’okukwatanisa kuteega orukwe rw’okukora omushango.

"Turiyo nituronda n’abandi bantu abarikuteekateekwaho kuba betabire omu kuteera omwana ogu abakibuzire kandi nitwija kubakwata tubateho omushango,” Pooriisi erikwongyera kushoborora.

Enanga naagira ngu Pooriisi y'ekyanga kya Rwizi eriyo necondooza enshonga egi.

#WestUpdates