Minisita Namuyangu na dayirekita wa Uganda Aids Commission, Dr. Musoba launching the national candle light on Thursday in Hoima-Wilson Asiimwe 1

N’ebya Wilson Asiimwe

Orurembo rwa Hoima eriizooba baatayayisa omugyenzo gw’eihanga ogw’okuhemba orumuri ogw’omwaka ogu bari ahansi y’omutwe gw’okumaraho endwara ya siriimu obwo amaisho bagateire ahabyanga. 

Arikugambaho n’abarikukwatwaho omururembo Hoima ah’izooba ry’orwakana, minisita w’enshonga za Bunyoro, Jenipher Namuyangu, agizire ngu orurembo rwa Hoima nirwo rwebembeire omukugira abantu abarikutuura n’akakooko ka siriimu n’ebicweka 6.6 ahari 100. 
Namuyangu agizire ngu okweyongyera kw’akakooko ka siriimu omubantu abashweraine kuri ahaiguru kandi nikwerarikiriza kandi nikwo kuhiga abarikukwatwaho boona kwegaita bakateera omuranga kurwanisa akakooko aka akarikureeta siriimu.

Agizire ngu abantu abaingi abashweraine bagumiizemu baaremwa kuhurikiriza ehururu y’okurwanisa ebikorwa by’omubonano aheeru y’obushwere bwabo ekireetsire okujanjaara kw’akakooko ka siriimu kwayeyongyera omu Uganda.

Ekiro ky’okwijuka abaitsirwe akakooko ka siriimu kitebeekanisiibwe aba Uganda AIDS Commission n’ekigyendererwa ky’okutaho ehururu y’okumanyisa ahabikwatiraine n’akakooko ka siriimu. 

Namuyangu agizire ngu abanya Uganda nibateekwa kwega kuta omuhendo ahamagara gaabo barekyere aho kuza omumubonano gw’aheeru y’obushwere ku baraabe nibenda kutuura bashemereirwe, batari mu kabi kandi bakatuura n’obwire buraingwa.

Nelson Musoba, mukuru w’akakiiko akarikwebembera ehururu z’okurwanisa akakooko ka siriimu (Uganda AIDS Commission), agizire ngu akakiiko aka kariyo nikakora n’abantu n’ebitongore ebirikukwatwaho kureebeka ngu ahi buraaze kuhikira omwaka gwa 2030, baamaraho akakooko ka siriimu omu Uganda.

“Turiyo nitukora n’aebitongore bitari bimwe na bimwe kureebeka ngu twamaraho akakooko ka siriimu ahi buraaze kuhikira omwaka 2030. Obushagiki obu buri kitongore kirikutuha n’obw’omuhendo omurutaro rw’okurwanisa akakooko ka siriimu ou ihanga,” nikwo agizire.

Robina Kansiime, orikukora emirimo y’okurwanisa akakooko ka siriimu omuri Hoima naagira ngu babugaine ekizibu ky’okuhwera omubaro gw’abantu abaine akakooko ka siriimu ogurikweyongyera na munonga omubaana.

#WestUpdates