Esente ezi zikwatsiibwe Rev. Fr. James Aliomu, Omubiki wa Dayosiisi egi bwanyima ya Misa ebaire ahari Our Lady of Lourdes Bujumbura cathedral, Hoima aha Sande ebiro 11.08.2024.

N’ebya ADMIN

Hoima

Purezidenti Yoweri Kaguta Museveni ahaireyo omuganda gwe gwa shiringi 300,000,000 ezi yaraganiise ahabw’okwombeka eirwariro ry’abakazi n’abaana erya St. Mary’s Children and Women specialized Hospital Hoima eririyo niryombekwa Dayosiisi y'abakaturiki eya Hoima.

Esente ezi zikwatsiibwe Rev. Fr. James Aliomu, Omubiki wa Dayosiisi egi bwanyima ya Misa ebaire ahari Our Lady of Lourdes Bujumbura cathedral, Hoima aha Sande ebiro 11.08.2024.

Arikuhayo esente ezi, enganzi y’eihanga Robinah Nabbanja asiimire Purezidenti Museveni ahabw’okuhikiriza okuraganisa kwe n’okwehayo kutunguura ekyanga kya Bunyoro n’eihanga ryona okutwariza hamwe.

Ashabire abatuura b’omu kyanga ekya Bunyoro okwejumbira omu puroguraamu za gavumenti ezigyendereire kurwanisa obworo omu maka g’abantu.

Nabbanja abaire ashendekyereziibwe Mary Grace Mugasa, Minisita w’eihanga ow’enshonga z’abakozi na Fred Byamukama, minisita w’eihanga ow’eby’entambura.

Asiimire ekereziya ahabw’omuganda ogubateireho kwongyerera ahantunguuka y’eihanga.

Hoima Catholic Diocese eriyo neronda shiringi 40,000,000,000 z’okwombeka eirwariro ry’abakazi n’abaana kubaasa kwongyera amaani omu buheereza bw’eby’amagara omu Dayosiisi egi n’ekyanga kya Bunyoro okutwariza hamwe.

Eirwariro eri nirishangwa aha kashozi ka Bujumbura omuri Hoima City West Divijoni kandi riri ah’eitaka rya Dayosiisi eririkwingana hiika 7.

Dayosiisi ya Hoima erimu za disiturikiti z’omu kyanga ekya Bunyoro ezirimu; Hoima, Masindi, Kibaale, Buliisa, Kiryandongo, Kagadi na Kakumiro.

#WestUpdates