Omushaija aitsire omukazi we na mwine-nyina- Kasese.
N’ebya John Masaba
KASESE
Pooriisi ekwatsire omushaija orikugambwa kuba aitsire abantu 2 abarimu n’omukazi we w’emyaka 40.
Jackson Muhindo akatwara omushango gw’okubura kw’omuntu wiiki ehwaire omu ka tauni ka Mukunu omu disiturikiti eya Kasese.
Kishangirwe ngu omuntu ou abaire naagira ngu akabura abaire ari omukazi we, Biira Mary orikugambwa kuba atwire abuzire kuruga aha kutandika kw’omwaka ogu.
Omugambirizi wa Pooriisi, Fred Enanga naagira ngu eki ababiri aba babaire bamazire emyaka 10 omu bushwere.
"Omu kwezi kwa 9, 2023, abanyabuzaare ba Biira Mary bakatabukira Jackson Muhindo barikumushaba kubagambira ahi omwana waabo ari beitu akaguma nayehozaho, Enanga arikushoborora omu rukiiko rw’abanyamakuru aha kitebe kikuru kya Pooriisi omuri Naguru, Kampala.
Nagaira ngu nyakuteekwateekwaho akwateirweho bwanyima y’enshonga egi kutwarwa aha Pooriisi ya Bwera omuri Kasese.
"Ku abuziibwe, nyakuteekateekwaho aikiriize kuba yayitsire omukazi we omu kwezi kw’okubanza, 2023 kandi ku yaherize yamuziika bweshereki,” Enanga arikushoborora.
Ayongiireho ngu omu kuzikuura omutumbi gw’omukazi, kishangirwe ngu nyakuteekateekwaho nabwo akaita mwine-nyina, Kabutusi Jolesi, omu kwezi kwa 7, 2023 nawe yamuziika bweshereki omu kyaro ekya Kyabikere 1 omu tauni kanso ya Kanyasi omuri Kasese.
"Nyakuteekateekwaho naagambwa kuba atwire nayikiriiriza omu by’abafumu kandi abaire ataine baana n’omukazi we. Abatuura berarikiriire ahabw’ebikorwa by’omushaija ogu eby’oburogi n’obwinazi,” Enanga arikugambaho n’abanyamakuru.
"Nitwenda kujumirira ebikorwa by’obwinazi n’obwitane ebirikurugiirira aha mihondano y’omu maka. Okukwata omwitsi ogu nikyoreka okutwehiireyo kurwanisa ebikorwa nk’ebi. Enanga naagira ngu okucondooza omunshonga egi kuriyo nikugyenda omu maisho kumanya ebigyendererwa bya nyakuteekateekwaho,” Enanga arikushoborora.
#WestUpdates