Bwanyima y’okumara emyaka 2 n’ameezi 4 aha rumanda, hati Echom naija kumara omu kihome emyaka 27 n’ameezi 8. Photo by Emmanuel Alomu.

N’ebya Emmanuel Alomu

Omuserukare wa UPDF ow’emyaka 34 acweriirwe kukomwa emyaka 30 omu kihome bwanyima y’okuteeraho kwita.

Pte Richard Echom asingisiibwe omushango gw’okuteeraho kwita omukundwa we omu mwaka gwa 2022.

Bwanyima y’okumara emyaka 2 n’ameezi 4 aha rumanda, hati Echom naija kumara omu kihome emyaka 27 n’ameezi 8.

Col Francis Katereho, Ceeyamaani wa kooti y’ekinyamahe ey’enkambi ya kashatu, amuhaire ekifubiro eki omu kooti eshutamire omuri Moroto Army Barracks omu kyanga ekya Karamoja Orwakana ebiro 21.11.2024.

Pte Richard Echom akegaita aha mahe omu mwaka gwa 2016.

Bwanyima y’okumara emyaka 6 omu mahe, Pte Echom akataahiirira omukundwa we, Daphine Atim n’embundu nikwo kumuteera amasasi. 

Atim n’omutuura w’omu kyaro ekya Cell B Senior Quarters omuri Burugwa-Izooba bw’orurembo Soroti.

Kooti ehurire ngu ekikorwa ky’okuteera omukundwa we amasasi kikabaho ebiro 24.07.2022.

Bwanyima y’okugira obuteikirizana n’omukundwa we, Echom nagambwa kuba yabandize yabura aha mukazi we na bwanyima nikwo kugaruka n’embundu erimu amasasi 30. 

Nagambwa kuba yabaire ayibire embundu egi ahari mutaahi we, Pte Joseph Lukwago owa 47th Infantry Battalion, owabaire nakorera omuri Soroti obwire obwo.

Ab’orubaju oruhababi beebembirwe Maj Jeff Ringaketch bagambiire kooti ngu Echom ku yagarukire yatandika kuteera omukundwa we amasasi omu kuju n’omu kibero. Akamujunaana okuza omuri rukundo n’omushaija ondaijo.

Echom ku yaherize kuteera omukundwa we amasasi yatoroka kuhisya obw’ab’obushoborozi omu mahe ga UPDF bamukwatsire.

#WestUpdates