Ab'ekitongore ky'amaizi omuri Sheema barikureeba aha purojekiti y'amaizi. PHOTO: Bruno Mugizi

N'ebya Bruno Mugizi

Abakuru omukitongore ky'amaizi aha disiturikiti ya Sheema hamwe n'abandi bebembezi omu disiturikiti egi batongoizeho purojekiti y'amaizi g'emipiira omumagomborora 3 aga Masheruka, Kyangyenyi hamwe na Kigarama omumatemba ga Sheema.

Omurimo gwa kilo mita 12 z'amaizi g'emipiira agarikwija kumaraho sente zirikuhika miriyooni 315 gurimu okwiha amaizi ahari Masyoro kuza Muzira, Katojo, Kakindo, kuza Kigarama gwa kilo mita 6, hamwe na Masheruka, Mabare Health 111 kuza omukyaro kya Rweicumu nazo kilo mita 6 hamwe n'okwombeka tanka y'amaizi ahari Kyabuharambo Primary School kandi omurimo ogu nigiwija kumara ameezi 3 kuhwa.

Ku abire natongozaho omurimo ogu erizooba rya nyomwebazyo aha gomborora ya Kyangyenyi Sheema Orikunda omuhwezi wa RDC ahabwa Sheema  disiturikiti ashabire ba konturakita kukotlra omurimo omubwire obubahiirwe kubaasa kuhisya abantu amaizi.

Mohamad Musisi, ori omuhandiiki w'eby'emirimo hamwe n'obuhangwa ahabwa disiturikiti ya Sheema ashabire abatuura kwakiira purojekiti egi kandi babaase kukoragana na ba konturakita omukukora omurimo murungi. 

Muhamad naagira ngu nka disiturikiti beehaireyo kureeba ngu disiturikiti ya Sheema yatunga amaizi buri kyaaro omwaka gwa 2025 gutakahikire.

We Abias Nkwasibwe, Ori inginiya w'eby'amaizi omu disiturikiti ashabire abatuura kuba ba kareebi ba purojekiti, eki agizire ngu nikiija kuhwera ba konturakita omukukora kurungi emirimo egi.

#WestUpdates