Museveni naagira ngu aine obuhame ngu NUP ekiiba akaruuru ka 2021. PPU Photos..

N’ebya Umar Kashaki

Purezidenti Yoweri Museveni naagira ngu aine obuhame ngu ekigombe ekya National Unity Platform (NUP) kikiiba oburuuru burikwingana 1,000,000 omu karuuru ka boona akateirwe 2021.

Museveni agambire ebi Orwakana ebiro 12.09.2024 ahamukoro gw’okusiima ah’eizooba ry’aha muheru aha biro 3 by’omworeko gw’eby’okwerinda ogwa Kampala Defence and Security Expo 2024 ogubaire ahari Speke Resort Munyonyo omuri Kampala.

Okushaba oku okubaire kukuriirwe Biishopu w’obureeberezi bwa North Kigezi, Rt. Rev. Onesmus Asiimwe arikuhwerwaho Rev. Patrick Tugume owahumwire kubaire ahakanisa ya All Saints Cathedral, Kampala.

Omworeko ogu gukatandika Orwakabiri ebiro 10.09.2024 kandi gumazire ebiro 3.

Omworeko ogu gubaire nigutamburira ahansi y’omutwe “Okwijuka amagara g’omugyenzi Hon. Gen. Aronda Nyakairima owabaire naakunda eihanga rye, Africa yoona kandi omurwaniirizi w’obusingye.

“Ntungire obuhame bwona oburikworeka ngu omu karuuru ka 2021, ekigombe ekya NUP kikiiba oburuuru burikwingana 1,000,000,” Museveni arikushoborora.

“Nyine obuhame. NUP nebaasa kuntwara omu kooti ngu nimbabeheerera kwonka eki nikyo kyabaireho,” Museveni otwire ari Purezidenti wa Uganda kuruga 1986 arikwongyera kushoborora.

Kwabuziibwe aha bigambo bya Purezidenti Museveni, Omuhandiiki mukuru w’ekigombe ekya NUP, David Lewis Rubongoya ashabire Museveni okureeta obuhame oburikworeka ngu NUP ekiiba oburuuru 1,000,000.

Rubongoya ayongiireho ngu NUP nayo eine obuhame burikworeka ngu akaruuru ka 2021 kakiibwa.

Omu karuuru ka 2021, Museveni akasinga Robert Kyagulanyi Ssentamu orikumanywa nka Bobi Wine kusinga encuro ye ya 6 y’okuteererwa akaruuru ahantebe y’obwa Purezidenti. Museveni akiihayo oburuuru 6,000,000 (58.38%) kandi we Bobi Wine akatunga oburuuru 3,600,000 (35%).

Bwanyima y’akaruuru kuhwa, Kyagulanyi akatabaaza omu kooti enkira zoona arikwenda ngu eshazemu ebyarugire omu karuuru aka ngu ahabw’okuba kakiibwa kandi kazamu n’emivuyo nyingi. 

Beitu hoona, Bobi Wine akaija yayihayo omushango ogu omu kooti arikugira ngu kooti negwera orubaju rumwe.

#WestUpdates