Omugambirizi wa Pooriisi, Fred Enanga arikugambaho n'abanyamakuru omu rukiiko rw'ebitongore by'okwerinda aha kitebe kikuru kya Pooriisi omuri Naguru, Kampala.

N’ebya Jeff Andrew Lule

Abantu bashatu abarimu n’omushaho w’ekiraguju bakwatsirwe ahabw’okugira akakwate n’okwita abavugi ba boda-boda 4 oteireho n’okwiba piki zaabo.

Pooriisi omu disiturikiti eya Kayunga ekwataniise n’ey’ekyanga ekya Elgon omuri Mbale babaasize kuhiga abantu aba kuhisya ahi bakwateirwe.

Banyakuteekateekwaho nibagambwa kuba baitsire abavugi ba bod-boda n’okutwara piki zaabo omuri Mbale ahari akatare kaazo okurugiirira ahari Fred Enanga, Omugambirizi wa Pooriisi omu Uganda.

Obujurizi obwahikireho nibworeka ngu ahabiro 04/12/2023, banyakuteekateekwaho bakagwera abavugi ba boda nikwo kubibaho piki zaabo.

Abakwatsirwe barimu; Rajab Sekajja, 42, omutuura wa Bulamula B omu gomborora eya Kitimbwa omu disiturikiti eya Kayunga, Innocent Mudede Innocent, 25 kuruga omu kyaro ekya Kitimbwa hamwe na Madina Nailuka, omushaho w’ekiraguju kuruga omu kyaro ekya Budada omuri Kayunga.

Arikugambaho n’abanyamakuru omu rukiiko rw’eby’okwerinda aharw’okubanza ebiro 18/12/2023 aha kitebe kikuru kya Pooriisi omuri Naguru, Kampala- Enanga akyorekire ngu abashatu aba nibagambwa kuba bari enyima y’okwita Godfrey Tesibwa Yairo aha biro 02/12/2023 n’okwiba piki ye ehandiikirwe omu namba ya UEX 2270C, eizire ekashangwa omuri Mbale.

Enanga naagira ngu bariyo nibataho oburyo bw’okumanya abandi bavugi ba boda-boda 3 abaitsirwe.

#WestUpdates