Ebitengure nabwo bitataataniise amaka 50 omu muruka gwa Kasangali omu gomborora eya Bwesumbu omu disiturikiti eya Kasese. Photo by Uganda Red Cross Society.

N’ebya Beth Akatukunda

KASESE

Emitumbi y’abaana bashatu ezikwirwe bwanyima y’ekitengure kushweka amaka agu babaire barimu omu kasheeshe k’orwakana.

Eki kizireho bwanyima y’enjura egwire omu kiro omu kyaro ekya Kyondo omu gomborora eya Kyondo omu disiturikiti eya Kasese.

Abaana bashatu aba babaire nibatuura na nyine-nkuru bo ogyerizeho kubacungura beitu akaremwa atyo akza kweta abantu kwija bakamuhwera beitu bakashanga abaana aba baafiire. 

Aharwakashatu, omukazi omanyirwe nka Alice Mbambu, 30, ow’omu kyaro kya Kanyatsi omu muruka gwa Nyakabingo omu gomborora eya Nyakabingo afiire bwanyima y’enju ye kubandaamirirwa ekitengure.

Omu disiturikiti eya Bunyangabu eheeriine n’eya Kasese, eka emwe aheerize kufeerwa abantu 4 omu gomborora eya Kateebwa.

Ebiro ebihingwire, tiimu y’okucungura amaka g’abantu kuruga omu kitongore ekya Uganda Red Cross Society etwire omu kyanga ekya Rwenzori kushwijuma oku abantu bateganisiibwe enjura erikugwa ebiro ebi n’okuhwera abantu abo.

Ebitengure nabwo bitataataniise amaka 50 omu muruka gwa Kasangali omu gomborora eya Bwesumbu omu disiturikiti eya Kasese.

#WestUpdates